Maradona By Kusturica (2008)
കാന് ഫിലിം ഫെസ്റ്റിവലിലെ പരമോന്നത ബഹുമതിയായ പാം ഡി ഓര് രണ്ടു തവണ കരസ്ഥമാക്കിയ പ്രശസ്ത സെര്ബിയന് ചലച്ചിത്ര സംവിധായകനായ എമീര് കസ്തൂരിക്കയുടെ ഡോകുമെന്ററി ഫിലിം ആണ് മറഡോണ. ഈ ഗ്രഹത്തിലെ ഏറ്റവും പരിചിതമായ മുഖങ്ങളില് ഒന്ന് എന്ന് വാഴ്ത്തപ്പെടുന്ന , ഫുട്ബാളിന്റെ ദൈവം എന്ന് ആരാധകര് വാഴ്ത്തിപ്പാടുന്ന ഡിയാഗോ അര്മാണ്ടോ മറഡോണയുടെ വശ്യവും, വിചിത്രവും, വിവാദപരവുമായ ജീവിതമാണ് ഈ സിനിമയുടെ വിഷയം.
കസ്തൂരിക്കയുടെ തന്നെ വാക്കുകളില് ഈ സിനിമ, "ഷൂട്ടിങ്ങിനിടയില് ഞാന് കണ്ടുമുട്ടിയ മൂന്നു മറഡോണമാരെ കുറിച്ചുള്ളതാണ്. ജീനിയസായ കളിക്കാരന്, അമേരിക്കയുടെ അധിനിവേശ രാഷ്ടരീയാതെ നിശിതമായി എതിര്ക്കുന്ന പൌരന്, ഒരു തികഞ്ഞ കുടുംബസ്നേഹിയായ പച്ച മനുഷ്യന്"
ചെഗുവേരയെയും കാസ്ട്രോയെയും ശരീരത്തില് പച്ചകുത്തി നടക്കുന്ന ഈ മനുഷ്യന് ലാറ്റിനമേരിക്കയുടെ പൊതുവായ വിപ്ലവധാരയെ പ്രതിനിധീകരിയ്ക്കുന്നതെങ്ങനെ എന്ന് ഈ ചിത്രം വ്യക്തമാക്കുന്നു. അതെ സമയം തന്റെ അരാജകമായ ജീവിത ശൈലിയിലൂടെ അദ്ദേഹം ഒരു പ്രഹേളികയായി മാറുന്ന കാഴ്ചയും ഈ ചിത്രത്തില് കാണാം. ഈ വൈരുധ്യങ്ങളുടെയും ഭ്രമാത്മകതകളുടെയും അങ്ങേയറ്റമാണ് അദ്ദേഹത്തെ ദൈവമാക്കിക്കൊണ്ട് രൂപീകരിയ്ക്കപ്പെട്ട 'ഇഗ്ലസിയാ മറഡോണിയാന 'എന്ന മതവും അതിന്റെ വിചിത്രമായ ആചാരങ്ങളും വിശ്വാസങ്ങളും.